Папата првпат се огласи откако поради рак му беше отстранет дел од белодробното крило

Папата Лав XIV (71), на кого лекарите вчера за време на операцијата му потврдиле рак на белите дробови, првпат се огласи по хируршкиот зафат. Тој им се заблагодари на верниците за молитвите и порача дека се моли за нив.

Во меѓувреме, Ватикан објави дека папата се опоравува според очекувањата, дека почнал да шета низ болничката соба и дека нормално се храни.

— реклама —

„Како што знаете, овие денови не можев да бидам меѓу вас. Од срце ви благодарам за молитвите и за заедничката работа што ја завршивте. Вашата размена на искуства и внимателното слушање навистина се дар за целата Црква“, порача папата во писмена порака до учесниците на собирот по повод десетгодишнината од документот Amoris laetitia, чиј автор е неговиот претходник, папата Франциск.

— реклама —

„Ве молам да се молите за мене, како што и јас се молам за вас“, додаде Лав XIV.

Папата вчера беше опериран во римската болница „Агостино Џемели“, откако лекарите за време на рутинските прегледи откриле јазол на белите дробови.

— реклама —

За време на операцијата било потврдено дека има аденокарцином на белите дробови, еден од најчестите облици на рак на белите дробови.

Хирурзите му го отстраниле долниот лобус од десното белодробно крило.Операцијата траела околу 90 минути, додека папата вкупно поминал приближно три часа во операционата сала.

Според лекарскиот извештај, зафатот бил успешно изведен и без компликации.