Градоначалникот на Општина Охрид, Кирил Пецаков, ја поздрави одлуката на Комитетот за светско наследство на УНЕСКО, со која Охридскиот Регион не беше впишан на Листата на светско наследство во опасност и беше одобрен дополнителен рок до 1 февруари 2031 година за реализација на препораките.
Пецаков оцени дека ваквата одлука е резултат на заедничките заложби и соработка меѓу локалната и централната власт, институциите и сите чинители вклучени во процесот, нагласувајќи дека таа претставува значајна можност, но и дополнителна одговорност за сите.
Тој истакна дека Општина Охрид и во наредниот период ќе продолжи со засилена реализација на мерките за заштита на природното и културното наследство, преку спроведување на капитални еколошки проекти, одговорно урбанистичко планирање, зајакнување на системите за заштита на животната средина и доследна примена на препораките на УНЕСКО.
Според Пецаков, зачувувањето на Охридскиот Регион е заедничка обврска на локалната и централната власт, институциите и граѓаните. Тој изрази уверување дека преку добра координација, континуирана посветеност и соработка со Република Албанија ќе бидат реализирани неопходните активности за зачувување на Охридскиот Регион како светско природно и културно наследство и за идните генерации.
