Пецаков: Охрид бил и ќе остане светски, започнуваме нова ера на засилена грижа

Градоначалникот на Охрид, Кирил Пецаков, информираше дека вчера и денес во Париз бил дел од државната делегација која остварила клучни средби во седиштето на УНЕСКО. Според него, посетата е од исклучително значење, бидејќи за првпат градоначалник на Охрид остварува директна средба со генералниот директор на УНЕСКО, Калед Ел-Енани.

— реклама —

Покрај оваа средба, делегацијата разговарала и со претседателот на 43-тата Генерална конференција на УНЕСКО, Конгкер Мохамад Талха, како и со претседателот на Извршниот одбор на УНЕСКО, Насер бин Хамад Ал Хинзаб. Пецаков посочи дека како градоначалник негова должност е гласот на Охрид да се слушне директно таму каде што се носат одлуките за светското наследство.

— реклама —

Тој нагласи дека на средбите јасно биле пренесени позициите на локалната и централната власт, дека Охрид претставува врвен приоритет и дека во тесна соработка со Владата се останува целосно посветен на спроведување на препораките за заштита. Според него, се работи на долгорочна и одржлива стратегија која ќе обезбеди зачувување на статусот на Охридскиот Регион на Листата на светско наследство.

— реклама —

Пецаков истакна и подготвеност за продолжување на соработката со Република Албанија, нагласувајќи дека заштитата на езерото и регионот бара заеднички пристап и координирано делување. „Охрид бара лидерство и конкретни дела“, порача градоначалникот, додавајќи дека посетата на Париз е почеток на нова ера на транспарентна и засилена грижа за природното и културното наследство.

— реклама —

„Охрид бил и ќе остане светски“, заклучи Пецаков, најавувајќи продолжување на активностите со конкретни чекори во насока на заштита и унапредување на регионот.