Германија денеска го изедначи историскиот температурен рекорд, откако во сојузната покраина Саксонија беа измерени дури 41,5 степени Целзиусови, соопшти Германската метеоролошка служба (DWD).
Истата температура била измерена и денот претходно во местото Мекерн-Древиц, со што официјално е потврден нов национален температурен рекорд.
Екстремниот топлотен бран предизвикува сериозни проблеми низ земјата. Во градот Кубшиц е регистрирана најтоплата ноќ во историјата на мерењата, бидејќи температурата не се спуштила под 29,4 степени.
Високите температури предизвикаа и низа шумски пожари. Најкритична е состојбата во шумската област Горишхајде, меѓу Саксонија и Бранденбург, каде што гори површина поголема од 16 хектари. Гаснењето е дополнително отежнато поради експлозии на стара муниција, бидејќи станува збор за поранешен воен полигон.
Слична ситуација е забележана и во покраината Рајнланд-Пфалц, каде што пожарникарите привремено ги прекинале активностите поради детонации на неексплодирани убојни средства, а дел од жителите биле евакуирани.
Жештините предизвикаа проблеми и во јавниот превоз. Во Лајпциг целосно е запрен трамвајскиот сообраќај, откако високите температури ги деформирале шините.
Германските метеоролози предупредуваат дека земјата и натаму останува под влијание на екстремен топлотен бран, а конечната потврда на сите температурни рекорди ќе биде објавена по деталната анализа на податоците.
