Претседателот Стево Пендаровски по Денешната седница на Советот за безбедност истакна дека Државата мора да најде начин своите граѓани да ги вакцинира и да им пружи здравствена заштита тука.
Пендаровски искажа благодарност до соседна Србија, затоа што таму се вакцинираа многу наши граѓани, но додаде дека ова не смее да се повтори.
„Сликите кои ги гледавме изминатиот викенд кога многу граѓани отидоа во соседна Србија да се вакцинираат едноставно не смеат да се повторат. Благодарност до Србија се разбира, но тоа беше срам за нашата држава. Едноставно, државата мора да најде начин своите граѓани да ги вакцинира и да им пружи здравствена заштита тука. Точно е дека се потпиравме на Ковакс, кој задоцни 2 месеци, точно е дека верувавме во Солидарниот фонд на ЕУ, точно е дека од 5 најбогати членки на ЕУ ниту една нема вакцинирано ниту 5% од населението, точно е дека според СЗО околу 80 проценти од вакцините се распоредени во 10 земји во светот. Но тоа нашите граѓаните не ги интересира“, истакна Пендаровски.
Тој апелираше до приватните болници да ги намалат цените за лекување на ковид-пациентите и им порача дека никој не треба да ги искористува личните трагедии за профит.
Претседателот рече и дека здравствените капацитети се искористени до максимум, но државата не смее да дозволи ниту еден наш граѓанин да не биде примен на болничко лекување. Од министерот Венко Филипче, пак, добил уверување дека такво нешто не се случило досега ниту ќе се случи во иднина.
Во однос на вакцинацијата на државниот врв и на другите функционери, шефот на државата рече дека на денешната седница се договориле, за да нема сомнеж дека некој ја злоупотребил позицијата, секој да се пријави за вакцина на интернет-страницата на Министерството за здравство, како и секој друг граѓанин на државата и да биде вакциниран тогаш кога ќе му дојде редот.
На денешната седница на Советот за безбадност покрај редовните членови, присуствуваа и министерот за здравство Венко Филипче и директорот на Агенцијата за национална безбедност (АНБ), Виктор Димовски.
фото: Кабинет на Претседател
