Пензиите во Германија од јули 2027 година би се зголемиле за 4,09 отсто

Повеќе од 21 милион пензионери во Германија би можеле да добијат повисоки примања од 1 јули 2027 година, со најавено зголемување на пензиите од 4,09 отсто. Ова произлегува од прелиминарните процени на германската влада во нацрт-извештајот за пензиското осигурување за 2026 година.

— реклама —

Според пресметките, пензија од 1.000 евра би се зголемила за 40,90 евра месечно. Сепак, конечниот процент на усогласување ќе биде утврден во пролетта на 2027 година, кога ќе бидат познати сите податоци за движењето на платите.

— реклама —

Најавеното зголемување е нешто пониско од претходните очекувања, кои предвидуваа раст од 4,4 отсто. Во јули 2026 година пензиите во Германија беа зголемени за 4,24 отсто.

Висината на усогласувањето првенствено зависи од движењето на платите, а влијание има и законската гаранција според која пензиите до 2031 година не смеат да паднат под 48 отсто од просечната заработка.

— реклама —

Придонесите за пензиско осигурување во 2027 година се очекува да останат на сегашното ниво од 18,6 отсто од бруто-платата. Според владините проекции, во 2028 година би се зголемиле на 19,7 отсто, а во 2029 година на 19,8 отсто.

— реклама —

Долгорочните процени покажуваат дека законските пензии до 2040 година би можеле да пораснат вкупно за 46,5 отсто, односно просечно по околу 2,8 отсто годишно. Во овие пресметки не се вклучени можните промени што би произлегле од најавената реформа на пензискиот систем.