Пензија дури на 70 години и укинување на предвременото пензионирање во Германија

Германија се подготвува за темелни промени во пензискиот систем, откако Комисијата за пензии се согласи за пакет од 30 мерки кои предвидуваат значително продолжување на работниот век, укинување на предвременото пензионирање и нов начин на финансирање на пензискиот фонд.

Предлозите официјално треба да му бидат претставени на федералниот канцелар Фридрих Мерц и на министерката за труд Бербел Бас на 23 јуни, објавува германското списание „Феникс“.

— реклама —

Една од најзначајните мерки е постепеното зголемување на старосната граница за пензионирање. Според предлогот, од 2071 година задолжителното пензионирање би било на 69 години, додека од 2091 година старосната граница би се зголемила на 70 години.

Покрај тоа, целосно би се укинала можноста за предвремено пензионирање на 63 години, која досега беше широко користена во Германија.

— реклама —

Новина е и инвестирањето на дел од пензиските придонеси на пазарот на капитал. Во почетната фаза, еден процентен поен од придонесите ќе се вложува на берзата, при што трошокот подеднакво ќе го делат работодавачите и вработените. Во иднина се планира овој удел да се зголеми на два процентни поени.

— реклама —

Од 2031 година повторно ќе биде воведен и т.н. фактор на одржливост, механизам што го поврзува растот на пензиите со бројот на осигуреници. Овој модел би требало да го забави растот на придонесите, но истовремено ќе значи и побавно зголемување на пензиите.

Меѓу предложените мерки е и проширување на кругот на лица кои ќе бидат обврзани да плаќаат пензиски придонеси. Така, во системот би биле вклучени и пратениците во Бундестагот и покраинските парламенти, самовработените лица, претприемачите, занаетчиите и претседателите на управните одбори на акционерските друштва. Засега, државните службеници остануваат надвор од овој систем.

— реклама —

Предлогот предвидува и целосно укинување на моделот на мини-работни места кои досега беа ослободени од плаќање пензиски придонеси. Во иднина, оваа поволност би важела само за ученици и студенти, доколку нивните месечни приходи не надминуваат 603 евра.

Предложените мерки сè уште не се усвоени и ќе бидат предмет на политичка расправа во наредниот период.