На територијата на Македонија до 18:00 часот се регистрирани вкупно 14 пожари на отворен простор, од кои пет сè уште се активни, два се ставени под контрола, а седум се целосно изгаснати.
Според најновите податоци, активни се пожарите во Општина Илинден кај селото Мршевци, каде што гори сува трева, во Општина Босилово кај селото Секирник, каде што е зафатена депонија, како и во Општина Чашка кај селото Војница, каде што огнот зафатил нискостебелна деградирана шума и сува трева.
Пожари се активни и во кавадаречкото село Шивец, каде што гори сува трева, како и во штипското село Долани.
Под контрола се ставени пожарите на градската депонија во Демир Хисар и на депонијата кај селото Железница во Општина Кратово.
Во текот на денот противпожарните екипи успеале целосно да изгаснат седум пожари. Интервенции имало кај католичките гробишта во Битола, во селото Мало Коњари и во близина на средното училиште „Орде Чопела“ во Прилеп, во тетовското село Непроштено, како и на три локации во Гостивар.
Надлежните служби остануваат на терен и продолжуваат со активностите за локализирање и гаснење на преостанатите жаришта.
