Пет возачи се лишени од слобода во текот на изминатото деноноќие поради сомнение за сторено кривично дело „безобѕирно управување со возило“, информира Министерството за внатрешни работи.
Полициските службеници интервенирале на различни локации низ државата. Од приведените возачи, тројца управувале возило без возачка дозвола, а меѓу нив имало и малолетник.
Еден од возачите бил затекнат како управува возило и покрај активна забрана за управување, додека друг управувал без возачка дозвола и под дејство на алкохол, по што со патничкото возило излетал од патот.
По целосното документирање на случаите, против возачите ќе бидат поднесени соодветни кривични пријави.
