Актерот Петар Арсовски, годинешен добитник на наградата „Голема ѕвезда на македонскиот филм“, изрази гордост што во македонската кинематографија се вложува и што таа, како што истакна, е рамо до рамо со светската.
Говорејќи на прес-конференцијата во рамки на ИФФК „Браќа Манаки“ во Битола, Арсовски потсети на своите први филмски кадри, кои ги снимил токму во овој крај, во близина на селото Лавци, во филмот „Македонскиот дел од пеколот“.
„Моите први филмски кадри ги снимив тука, во Битола, на ова поднебје, во близина на селото Лавци, каде дебитирав. Но, како тогаш така и сега мислам дека има ист ентузијазам во македонската кинематографија и во таа смисла јас сум горд што во македонската кинематографија се вложува и е рамо до рамо со светската“, рече Арсовски.
Тој посочи дека особено го радува појавувањето на нови генерации филмски работници кои освојуваат награди на меѓународни фестивали.
„Убаво е што се појавија нови деца кои собираат куп награди на меѓународни фестивали и уверен сум дека иднината на македонскиот филм е сигурна, како и некогаш. Среќен сум и мирен сум дека и во иднина ќе се гледаат добри филмови“, истакна актерот.
За Арсовски, ИФФК „Браќа Манаки“ е сериозен фестивал, а особено емотивно го доживеал приемот по доделувањето на наградата.
„Тоа што синоќа ми се случи со долготрајниот аплауз за добиената награда за мене беше голема возбуда и изненадување“, нагласи Арсовски.
Тој откри дека во моментов нема понуди за филмски ангажмани, но нагласи дека не размислува за повлекување и би прифатил нова улога.
„За мене големите и малите улоги се ист предизвик“, порача Арсовски.
