Петкоска: Македонија бележи раст од 40% на авионски пристигнувања во првиот квартал

Пратеничката на ВМРО-ДПМНЕ, Лидија Петкоска, на денешната собраниска седница истакна дека туризмот во Македонија бележи раст и дека инвестициите во инфраструктурата, авиосообраќајот и туристичката понуда можат да придонесат за локалниот економски развој.

— реклама —

Повикувајќи се на податоците на Државниот завод за статистика, Петкоска посочи дека бројот на туристи во 2024 година бил зголемен за 8 отсто во споредба со 2023 година. Таа нагласи дека развојот на туризмот треба да се поврзе со подобра патна и железничка инфраструктура, инвестиции во животната средина и поддршка за малите бизниси.

— реклама —

Како туристички места со потенцијал за понатамошен развој ги посочи Охрид, Струга, Преспа, Маврово, Крушево, Берово и Дојран, додавајќи дека придобивките од туризмот се чувствуваат и кај рестораните, превозниците, занаетчиите, земјоделците и локалните производители.

Петкоска се повика и на извештајот „Tourism Watch“ на Светската банка од јуни 2026 година, според кој Македонија во првиот квартал од 2026 година забележала раст од 40 отсто на авионските пристигнувања во споредба со истиот период претходната година. Во истиот период, туристичките пристигнувања пораснале за 6,9 отсто.

— реклама —

Таа додаде дека во првите пет месеци од 2026 година аеродромите во Скопје и Охрид забележале раст од 31,2 отсто на патничкиот сообраќај, со вкупно повеќе од 1,58 милиони патници. Според неа, овие резултати укажуваат на поголема поврзаност со европските дестинации и отвораат нови можности за хотелите, рестораните и семејните бизниси.

„Преку инвестициите во инфраструктурата, отворањето нови авиолинии и поддршката за туристичката понуда, економскиот раст се претвора во можност за граѓаните. Тоа е развој што се мери, а не само се ветува“, изјави Петкоска.