ПЕТ/КТ скенерот на УИ ПЕТ не работи, пациентите ќе се упатуваат на други дијагностички методи

ПЕТ/КТ скенерот на Универзитетскиот институт за позитронска емисиона томографија (УИ ПЕТ) моментално не работи поради технички дефект, информира Министерството за здравство.

— реклама —

Од Министерството наведуваат дека проблемот е поврзан со производството на радиоизотопи и со циклотронот. Овластениот сервисер интензивно работи на отстранување на дефектот, а преземени се потребните мерки апаратот повторно да биде ставен во функција во најкраток можен рок.

— реклама —

Според Министерството, проблемот е последица на долгогодишно занемарување и недоследно следење на протоколот за превентивно одржување на дифузионата пумпа, вклучително и нејзино редовно чистење и замена на маслото на секои пет години. Оттаму велат дека актуелното раководство веднаш по утврдувањето на состојбата презело мерки за надминување на проблемот.

— реклама —

Министерството додава дека се преземаат и активности за набавка на нова опрема, со цел здравствениот систем во иднина да не зависи од еден апарат.

Клиниката за онкологија и радиотерапија и Клиниката за хематологија се веќе информирани и ќе вршат понатамошна тријажа преку други достапни дијагностички методи, со цел лекувањето на пациентите да продолжи без прекин.