Основното јавно обвинителство за гонење на организиран криминал и корупција отвори истражна постапка против пет лица од Скопје, на возраст од 22 до 34 години, кои се осомничени за кривичното дело „Терористичка организација“.
Постапката е поведена по кривична пријава поднесена од Министерството за внатрешни работи, а предметот е резултат на координирани активности спроведени под раководство на јавен обвинител, во соработка со Секторот за борба против тероризам, насилен екстремизам и радикализам и Агенцијата за национална безбедност.
Според Обвинителството, првоосомничениот кон крајот на 2024 година формирал интернет канал и група на социјална платформа во која членувале и останатите осомничени.
„Во текот на 2025 и 2026 година, преку овие комуникациски канали осомничените ширеле содржини со кои се промовирала и поддржувала идеологијата на терористичката организација ИСИС и други идеолошки поврзани терористички организации, како и џихадистички идеолошки материјали. Целта била ширење на пропаганда, идеолошка индоктринација и глорификација на терористички дејствија и нивни извршители“, соопшти Обвинителството.
По наредба на судија на претходна постапка, вчера биле извршени претреси на пет локации во Скопје. Три од нив биле во Казнено-поправната установа „Идризово“, каде што двајца од осомничените издржуваат затворски казни за други кривични дела, а еден се наоѓа во притвор. Претреси биле извршени и на уште две локации поврзани со останатите осомничени.
При претресите биле пронајдени и одземени повеќе електронски уреди и други предмети кои ќе бидат предмет на вештачење и понатамошна доказна постапка.
Судија на претходна постапка при Основниот кривичен суд Скопје делумно го прифатил предлогот на јавниот обвинител. На еден од осомничените му е определен притвор, додека за вториот е изречена мерка куќен притвор. За останатите лица засега не се соопштуваат дополнителни мерки.
