Тринаесет возачи се лишени од слобода во изминатото деноноќие на територијата на целата држава поради „безобѕирно управување со моторно возило“, соопшти Министерството за внатрешни работи.
Од приведените, седум управувале возило без возачка дозвола, а еден од нив бил малолетник. Еден од возачите, покрај тоа што немал дозвола, бил и под дејство на алкохол.
МВР информира дека меѓу лишените од слобода е и странски државјанин кој бил запрен на граничниот премин Табановце.
Преку системот „Безбеден град“ било утврдено дека тој управувал со брзина од 164 километри на час на место каде што максималната дозволена брзина била 80 километри на час.
Пет лица, според полицијата, управувале возило под дејство на алкохол. Еден од нив учествувал во сообраќајна несреќа во која се здобил со тешки телесни повреди.
Од МВР најавуваат дека по целосно документирање на случаите ќе бидат поднесени соодветни кривични пријави.
Полицијата упати апел до сите учесници во сообраќајот да ги почитуваат правилата и прописите, да не управуваат возило без положен возачки испит, со изречена забрана за управување или под дејство на алкохол.
Од МВР порачуваат дека почитувањето на сообраќајните правила е неопходно за поголема безбедност на патиштата.
