Двајца македонски студенти во Соединетите Американски Држави, Дарко Најдов и Бојан Блажевски, го одбележаа Денот на независноста на Македонија со искачување на Лонгс Пик во Колорадо – врв висок 4.346 метри, сместен во националниот парк „Роки Маунтин“.
Во потфатот им се придружил и нивниот колега Лаксман, со кого работат во Колорадо. За него ова било второ искачување на Лонгс Пик, додека за Најдов и Блажевски претставувало ново планинарско искуство, но и начин националниот празник да го одбележат илјадници километри од Македонија.
Искачувањето започнало на 8 септември во 2:15 часот по полноќ, од станицата „Лонгс Пик Рејнџер“, по патеката „Џимс Гроув“.
Поголемиот дел од почетната маршрута го поминале во темница, а со приближувањето кон врвот теренот станувал сè пострмен и посложен. Тројцата продолжиле по маршрутата „Кихол“, позната по изложените карпести делови, тесните премини и местата на кои е потребно особено внимателно движење.
Лонгс Пик важи за еден од најпознатите, но и најпредизвикувачките врвови во националниот парк. На планината досега се регистрирани повеќе од 70 смртни случаи.
По повеќе од девет часа искачување, Најдов, Блажевски и Лаксман пристигнале на врвот во 11:34 часот. Целата планинарска тура, заедно со спуштањето, траела околу 15 часа.
На самиот врв, Дарко и Бојан го развеале македонското знаме, одбележувајќи го 8 Септември на 4.346 метри надморска височина.
„Од Македонија до Колорадо, а на 8 Септември – на врвот на Лонгс Пик“, е пораката со која го опишуваат моментот што ќе остане како посебен дел од нивното искуство во САД.
