Пратеничката на СДСМ, Славјанка Петровска, реагира на начинот на кој институциите ја одбележаа безбедноста на водата во Гостивар, оценувајќи дека фотографијата со чаши вода не може да ги избрише прашањата што остануваат отворени по труењето на граѓаните.
Во објава на социјалните мрежи, Петровска вели дека еден месец по случајот, наместо целосен јавен извештај и расчистена одговорност, јавноста добила фотографија пред чешма.
Таа се повикува на досегашните информации од истрагата, според кои спорните пумпи биле поставени на 25 јуни, а две од нив сè уште работеле при контролата на 16 јули. Петровска посочува и дека на 13 јули Центарот за јавно здравје Тетово ја оценил водата како безбедна, додека истата ноќ биле регистрирани првите пациенти.
Во објавата таа потсетува и на информациите дека екипа на Институтот за јавно здравје, испратена по налог на јавен обвинител, била спречувана да земе мостри. Прашува кој ги попречувал во работата и дали некој ќе понесе одговорност.
Петровска го критикува и доцнењето во јавното огласување на министерот за здравство Сашо Клековски, кој, како што наведува, се огласил на 18 јули, пет дена по регистрирањето на првите случаи.
Таа потсетува дека за случајот се приведени три раководни лица од „Комуналец“, но нагласува дека нивната вина треба да ја утврдат Обвинителството и судот и дека тие не треба да станат „алиби за целиот систем“.
„Кој контролирал? Кој ги добивал анализите? Како водата била оценета како безбедна? Зошто граѓаните не биле навреме предупредени?“, прашува Петровска.
Таа бара истрагата да продолжи до сите нивоа до кои водат доказите, без, како што вели, запирање таму каде што е најудобно.
„Исправната вода не е политички успех. Таа е основна обврска. Оставете ги чашите. Отворете ги документите“, порача Петровска.
