Пратеникот на ВМРО-ДПМНЕ, Бране Петрушевски, обвини дека претседателот на Синдикатот на УПОЗ, Трпе Деаноски, потрошил околу 60.000 евра синдикални средства за организирање настан во Црна Гора, наместо средствата да бидат вложени во домашната економија.
На денешната прес-конференција, Петрушевски оцени дека постои контрадикторност меѓу јавните настапи на синдикалните претставници и начинот на кој се трошат парите на членовите.
„Од една страна велат дека се живее во сиромаштија, а од друга страна се трошат 60.000 евра за луксуз во Црна Гора“, изјави Петрушевски.
Тој посочи дека настанот можел да биде организиран во некој од домашните туристички центри, со што средствата би останале во македонската економија.
Според Петрушевски, ваквото трошење отвора прашања за тоа дали синдикалните средства се користат за заштита на работничките права или за туристички аранжмани и патувања во странство.
Пратеникот на ВМРО-ДПМНЕ истакна дека ваквите постапки влијаат врз кредибилитетот на синдикалните организации и нивната доверба кај членството.
Од Синдикатот засега нема реакција на обвинувањата изнесени од Петрушевски.
