Пратеникот на ВМРО-ДПМНЕ, Бране Петрушевски, денеска изнесе нови обвинувања поврзани со случајот во кој е споменат Стефан Богоев, тврдејќи дека станува збор за афера која, според него, води кон многу поголем криминал од досега објавениот.
На прес-конференција, Петрушевски изјави дека случајот не треба да се гледа само низ призмата на наводниот поткуп од 2.000 евра, туку дека треба да се испита целиот процес поврзан со тендер вреден 18 милиони денари.
Тој тврдеше дека Богоев и лице познато како Џемо од Прилеп, користејќи ги своите позиции и влијание, наводно учествувале во местење на тендер во државна институција.
Петрушевски повика до Јавното обвинителство да ги провери информациите кои, како што рече, ги добиле од свиркачи, а според кои наводно било договорено Богоев да добие 10 проценти од вредноста на тендерот, односно околу 1,8 милиони денари.
„Го повикуваме Јавното обвинителство да истражи дали се точни информациите дека требало да биде исплатен процент од тендерот вреден 18 милиони денари“, изјави Петрушевски.
Тој додаде дека, според ВМРО-ДПМНЕ, случајот не треба да се третира како изолиран инцидент, туку како дел од поширока партиска шема поврзана со СДСМ, имајќи предвид дека, како што посочи, Богоев бил поставен на функција од оваа партија.
Од СДСМ и од споменатите лица засега нема реакција на обвинувањата изнесени од ВМРО-ДПМНЕ.
