(Во живо) Петрушевски за пратеничките привилегии: „Зошто мислите дека јас живеам подобро од граѓаните?“

Пратеникот од ВМРО-ДПМНЕ, Бране Петрушевски, во гостувањето во поткастот „Претрес со Ландов“ на прашањето за пратеничките патни трошоци рече дека нивното исплаќање е законски регулирано и дека станува збор за систем кој постои и во европските држави.

Петрушевски посочи дека доколку патните трошоци не постојат, тоа би ги ставило пратениците од внатрешноста во понеповолна положба во однос на оние од Скопје.

„Системот на подмирување на патни трошоци е еден европски систем којшто го има секаде во Европа и создава еднаквост помеѓу пратениците“, рече Петрушевски.

— реклама —

Тој додаде дека не е добро Собранието да има само пратеници од Скопје, бидејќи пратениците од другите градови би имале значително поголеми трошоци доколку секојдневно патуваат до главниот град.

„Претрес“ на Бране Петрушевски: ВМРО на власт, Заев и Филипче на јахта, Максим, ДУИ и работниците Гледај на LANDOV.MK 2:57:00

— реклама —

Во дебатата беше спомената и можноста пратениците да користат стан во Скопје наместо патни трошоци. Петрушевски рече дека во неговиот случај тоа би било поскапо.

„Доколку земам стан во Скопје, ќе трошам многу повеќе за кирија отколку патните трошоци коишто ги троши Собранието за мене“, рече тој.

Петрушевски се спротивстави и на тезата дека пратениците треба да живеат на ист начин како граѓаните кои работат во странство и се одвоени од своите семејства за да заработат.

— реклама —

„Ако сакаме да бидеме сериозни, зборуваме за луѓе коишто имаат свој семеен живот, имаат свои семејни обврски, имаат свои деца коишто треба да ги воспитуваат, имаат свои сопруги и сопрузи со коишто треба да бидат“, рече Петрушевски.

Во разговорот беше отворено и прашањето за неговата плата од околу 109.000 денари.

На забелешката дека пратениците имаат повисоки примања и привилегии, Петрушевски рече дека знае граѓани кои имаат многу поголема плата од неговата и посочи дека неговата сегашна плата треба да се гледа и во контекст на неговото претходно работно искуство.

„Зборувате за пратеник којшто зема плата од 109.000 неколку години. Од каде го знаете мојот претходен бекграунд и како сум јас раснат, и како сум се школувал, и какви работи сум работел претходно?“, рече Петрушевски.

Тој откри дека пред да стане пратеник работел како советник за развој на апликации и бил програмер.