Дваесет и деветгодишен охриѓанец се здобил со тешки телесни повреди откако изгубил контрола и паднал со електричен тротинет во Охрид. Од МВР информираат дека тој го управувал тротинетот под дејство на алкохол.
Случајот бил пријавен на 7 септември во 23:30 часот во СВР Охрид. Според информациите, Ј.Т.(29) од Охрид управувал електричен тротинет на улицата „Марко Нестороски“, при што изгубил контрола и паднал на коловозот.
Во несреќата тој се здобил со тешки телесни повреди, кои биле констатирани во болницата „Св. Еразмо“ во Охрид.
При преземањето мерки и извршениот увид било утврдено дека охриѓанецот управувал под дејство на алкохол. Кај него биле измерени 2,12 промили алкохол во крвта.
По целосното документирање на случајот, против него ќе биде поднесена соодветна пријава, соопшти МВР.
