Пиперката е една од најздравите намирници што редовно се наоѓа на трпезите, а нејзината вистинска вредност се крие во богатството од витамини, минерали и антиоксиданси кои имаат силно позитивно влијание врз здравјето.
Иако многумина витаминот Ц го поврзуваат со портокалот, пиперката содржи значително поголеми количини. Една свежа пиперка може да обезбеди и до 150 милиграми витамин Ц, што е повеќе од доволно за дневните потреби на организмот. Покрај тоа, станува збор за нискокалорична намирница со висок процент вода, што придонесува и за подобра хидратација.
Сите пиперки првично се зелени, а со зреењето добиваат жолта, портокалова или црвена боја. Колку е позрела пиперката, толку е послатка и побогата со хранливи материи.
Особено се издвојува црвената пиперка, која содржи најголемо количество витамини и антиоксиданси и се смета за најхранлива од сите видови.
Покрај витаминот Ц, пиперката содржи и:
Бета-каротен, важен за добар вид и силен имунитет;
Витамин Б6, кој помага во создавањето на црвените крвни зрнца;
Витамин К, неопходен за здрави коски;
Витамин Е, кој ги штити клетките од оштетувања;
Калиум, значаен за здравјето на срцето и регулирањето на крвниот притисок;
Фолна киселина, корисна за целокупниот организам.
Пиперката е богата со моќни антиоксиданси кои го намалуваат оксидативниот стрес и ги штитат клетките од дејството на слободните радикали.
Црвената пиперка содржи ликопен и капсантин, додека зелената е богат извор на лутеин, соединение кое има важна улога во зачувувањето на здравјето на очите. Овие состојки можат да помогнат во намалување на ризикот од срцеви заболувања и други хронични болести.
Лутеинот и зеаксантинот ја штитат мрежницата на окото и можат да придонесат за зачувување на видот, особено кај постарите лица.
Дополнително, високиот процент на витамин Ц ја подобрува апсорпцијата на железото од растителната храна, па пиперката е особено корисна за луѓето кои имаат недостаток на железо или се склони кон анемија.
Калиумот придонесува за регулирање на крвниот притисок, додека витаминот Ц го поттикнува создавањето колаген, важен за здрава, цврста и еластична кожа.
Благодарение на растителните влакна, пиперката позитивно влијае и на дигестивниот систем и го подобрува функционирањето на цревата.
Експертите препорачуваат пиперката што почесто да се консумира свежа, бидејќи така се зачувува најголемиот дел од витаминот Ц, иако и кратката термичка обработка ги задржува повеќето од нејзините корисни состојки.
