(Во живо) „Платата што ја имам не е доволна, но тоа не е причината за кандидатурата“: Раичевиќ

Лидија Раичевиќ, кандидатка за раководната позиција во Обвинителството за гонење организиран криминал и корупција (ОЈО ГОКК), во разговор за мотивите за нејзината кандидатура и состојбите во обвинителството во поткастот „Претрес со Ландов“ изјави дека нејзиниот интерес за функцијата не е воден првенствено од платата, туку од можноста да влијае врз работата на институцијата.

„Сите сакаме повеќе пари. Јас сакам да живеам од својата плата чесно. Сметам дека платата што ја имам не е доволна и сакам да имам поголема плата. Ама мотивот да конкурирам за обвинител на Основното јавно обвинителство за гонење на криминал не е платата, сигурно“, рече Раичевиќ.

Таа посочи дека функцијата носи поголем авторитет, но направи разлика меѓу раководната улога и овластувањата на обвинителите што постапуваат по конкретни предмети.

— реклама —

Според неа, јавните обвинители имаат законски овластувања да одлучуваат за предметите што им се доделени, додека раководителот има организациска и менаџерска улога, со задача да обезбеди институцијата да функционира ефикасно.

Во разговорот Раичевиќ беше прашана и за наводите дека некои обвинители можеби прават недозволени договори околу одредени предмети.

Таа потврди дека слушнала такви шпекулации, но нагласи дека нема докази дека некој обвинител примил пари за одреден предмет.

— реклама —

„Имам слушнато дека се прават одредени шпекулации. Доказ немам“, рече Раичевиќ.

На прашањето дали знае кои обвинители би можеле да бидат вмешани во такви постапки, таа одговори дека би ги посочила доколку располага со конкретни докази.

„Да шуруваат со одредени предмети, а кои се тие обвинители, да имам точни докази, ќе ви кажам. Сега не“, изјави кандидатката.

— реклама —

Раичевиќ нагласи дека евентуалните неправилности треба да се утврдуваат врз основа на докази, а не врз шпекулации. Додаде дека, доколку биде избрана, ќе се залага за одговорност и за јавно укажување на пропустите во работата на обвинителите.

Во разговорот беше отворено и прашањето дали, како раководителка, би можела да се спротивстави на евентуални неформални влијанија во обвинителството.

Раичевиќ порача дека не планира да се приспособува на такви практики и дека нејзиниот пристап ќе биде заснован на професионалните стандарди и доказите.

На забелешката дека нејзиниот директен настап би можел да влијае врз шансите за избор, таа одговори:

„Нека не ме изберат. Јас сум таа Лидија.“

Од лекот за Ива Михаилова до Бошкоски, „Ровер“ и криминалот – Барбов и Раичевиќ во „Претрес“