Во услови кога инфлацијата е под контрола, платите во Германија продолжуваат да растат побрзо од цените, што доведе до зголемување на реалната куповна моќ на вработените.
Според податоците на германскиот завод за статистика Дестатис, во првиот квартал од 2026 година платите номинално се зголемиле за 4,1 отсто во споредба со истиот период лани, додека инфлацијата изнесувала 2,2 проценти. Тоа значи дека реалните плати пораснале за 1,8 проценти.
Ова е продолжување на позитивниот тренд кој трае веќе три години, откако Германија успеа да го стабилизира инфлаторниот бран предизвикан од војната во Украина. Последен пат реален пад на заработувачките бил регистриран во првиот квартал од 2023 година.
Најголем раст на платите е забележан во рударството, каде заработувачките се зголемиле за 6,9 проценти, следени од финансиските услуги и осигурувањето со раст од 6,5 проценти, како и енергетскиот сектор со 5,9 проценти.
Од друга страна, градежништвото и јавниот сектор бележат помал раст, од 2,9 проценти и само 0,1 процент.
Најголема корист од зголемувањето на минималната плата на 13,90 евра за час имаат работниците со најниски примања. Според статистиката, најниско платените 20 проценти од работниците добиле просечно зголемување на платите од седум проценти, додека највисоко платените 20 проценти забележале раст од 3,5 проценти.
Значително се зголемени и примањата на приправниците, за 6,8 проценти, најмногу поради покачувањето на минималниот надоместок за стручно оспособување на 724 евра месечно.
Сепак, економските експерти предупредуваат дека новите тензии на Блискиот Исток и растот на цените на енергенсите би можеле да го забават овој позитивен тренд во наредниот период.
