По долга и тешка болест почина пејачот Мирко Цетински, таткото на Тони Цетински

Хрватскиот пејач Мирко Цетински, татко на познатиот пејач Тони Цетински, почина во четвртокот на 78-годишна возраст, по долга и тешка болест. Зад себе остави музичка кариера долга шест децении, исполнета со бројни песни, концерти и настапи низ светот.

Роден е во 1948 година во Пула, а првиот јавен настап го имал во 1962 година, на натпреварот „Прв аплауз“ во родниот град. Шест години подоцна за првпат настапил на фестивалот „Мелодии на Истра и Кварнер“.

— реклама —

Важен пресврт во неговата кариера се случил во 1972 година, кога на Загрепскиот фестивал ја извел песната „Моето лудо срце“. Настапот му донел нови ангажмани, турнеи и прва златна плоча.

— реклама —

Меѓу познатите песни на Цетински се „Плачи, плачи, гитаро“, „Појди со мене до Ровињ“ и „На едрење“. Посебно место во неговото творештво зазема „Viecia Batana“, посветена на Ровињ. Пеел на хрватски и италијански јазик, како и на нивните дијалекти, а за песната „Kupil sam ti prstenac“ ја освоил наградата на публиката на фестивалот „Мелодии на Истра и Кварнер“.

Во текот на кариерата одржал 24 турнеи низ Соединетите Американски Држави, четири во Австралија и стотици концерти низ Европа.

— реклама —

„Никогаш не престанав да пеам, бидејќи пеењето е мојот живот“, изјавил во едно интервју.

Покрај музиката, Цетински оставил трага и во медиумскиот живот на Истра. Бил еден од основачите на Радио Ровињ, кое започнало со емитување на 14 февруари 1997 година. Во 2023 година, градот Ровињ му ја доделил Златната медалја за придонесот во музиката и развојот на локалното радио.

Последното испраќање ќе се одржи во кругот на семејството, кое побарало сочувството да биде изразено мирно и дискретно. Датумот и местото на комеморацијата ќе бидат објавени дополнително.