По изборниот пораз, Ванс ја критикува војната во Иран и најавува промени во републиканската стратегија

Американскиот потпретседател Џеј Ди Ванс сè повеќе настапува со сопствени политички пораки, наместо да ги брани политиките на претседателот Доналд Трамп. Промената на стратегијата стана особено забележлива во завршницата на изборната кампања, во која републиканците претрпеа пораз и ја загубија контролата врз Конгресот, објави „Ројтерс“.

— реклама —

Според анализата на неговите говори од септември наваму, Ванс ги промовирал партиските цели преку теми што се дел од неговиот политички профил – економски национализам, воздржаност во надворешната политика и јавна безбедност. Истовремено, избегнувал директно да ги истакнува непопуларните политики на Трамп, меѓу кои војната во Иран и депортациите.

Промената, според извори запознаени со стратегијата, била намерна. Ванс и неговите советници процениле дека овие теми се негови силни политички адути и дека може уверливо да ги застапува. Иако Трамп ги вклучи во движењето МАГА, потпретседателот сè повеќе се наметнува како нивен главен промотор.

— реклама —

Ванс во средата направи и поостар чекор, јавно посочувајќи ја војната во Иран како една од причините за изборниот неуспех на републиканците. Тој побара брзо завршување на судирот и повика партијата да се посвети на животниот стандард, да ја преиспита надворешната политика и темелно да ги промени односите на САД со Израел.

— реклама —

Ова беше негово прво јавно спротивставување на војната. Сепак, извори блиски до Белата куќа и тимот на Ванс тврдат дека тој не ги прекинува односите со Трамп. Според нив, шефицата на кабинетот на Белата куќа, Сузи Вајлс, однапред била запознаена со неговата објава.

Иако Ванс сè уште не потврдил дали ќе се кандидира за претседател во 2028 година, веќе се споменува како еден од водечките можни кандидати на републиканците. Неговиот предизвик ќе биде да го задржи гласачкото тело на Трамп, но истовремено да се огради од политичкиот товар на актуелниот претседател.

— реклама —

По изборниот пораз, и други републикански политичари понудија свои објаснувања. Сенаторот Тед Круз смета дека партијата не посветила доволно внимание на трошоците за живот, додека гувернерот на Флорида, Рон Десантис, оцени дека премногу се занимавала со правата на трансродовите лица, а ги занемарила грижите на граѓаните поврзани со центрите за податоци и вештачката интелигенција.