Украинската премиерка Јулија Свириденко официјално поднесе оставка, откако претседателот Володимир Зеленски најави реконструкција на Владата како дел од новата политичка стратегија на земјата.
Свириденко соопшти дека одлуката ја донела по разговор со Зеленски, на кој биле разгледани предизвиците со кои се соочува Украина, потребните промени во работата на Владата и односите со меѓународните партнери. Нејзината оставка сè уште треба да биде потврдена од украинскиот парламент.
Зеленски најави дека Свириденко ќе добие нова функција, во која ќе биде задолжена за соработката со клучните меѓународни партнери на Украина.
Одлуката предизвика изненадување кај дел од пратениците од владејачката партија „Слуга на народот“, кои, според украинските медиуми, не гледаат очигледна причина за смената на премиерката.
Според информации на „Киев Индипендент“, како можни наследници се споменуваат директорот на државната енергетска компанија „Нафтогас“ Сергиј Корецки, министерот за енергетика Денис Шмихал, министерот за одбрана Михајло Федоров и градоначалникот на Харков Игор Терехов.
Зеленски објави дека во текот на денот се сретнал со сите четворица потенцијални кандидати, но засега не откри кој ќе биде новиот премиер.
Украинскиот претседател најави дека новата политичка стратегија ќе биде насочена кон продлабочување на соработката со САД и Европската Унија, зајакнување на односите со Полска и Унгарија, како и кон продолжување на дипломатските активности за ставање крај на руската инвазија.
