Во населбата Нерези се реализираат градежни активности за замена на старата и дотраена водоводна мрежа, со што по неколку децении треба да се решат долгогодишните проблеми со слабиот притисок на водата и честите дефекти.
За текот на работите увид извршија градоначалникот на Град Скопје, Орце Ѓорѓиевски, и директорот на ЈП „Водовод и канализација“, Сотир Лукровски.
Со реконструкцијата жителите на овој дел од градот треба да добијат посигурно водоснабдување, подобар притисок и поквалитетна водоводна инфраструктура.
По завршувањето на работите на водоводната мрежа, предвидено е и асфалтирање на улицата, со што целосно ќе се обнови сообраќајната инфраструктура на оваа локација.
Од Град Скопје посочуваат дека ваквите проекти се дел од активностите за модернизација на комуналната инфраструктура и подобрување на условите за живот во сите делови на градот.
