По пријавата за семејно насилство биле преземени полициски мерки за заштита, вели Јанев

Директорот на Бирото за јавна безбедност, Александар Јанев, денеска во СВР Струмица ја презентираше хронологијата на постапувањето на полицијата во случајот со трагичната смрт на 17-годишната Билјана и нејзиното 21-годишно момче во Богданци. Тој истакна дека МВР соодветно реагирало на пријавата и дека по случајот било постапувано институционално.

— реклама —

Според Јанев, пред настаните од 30 септември 2026 година, во полициските евиденции немало претходни пријави ниту за Билјана ниту за момчето, вклучително и за семејно насилство.

Првата пријава била поднесена ноќта на 30 септември, кога Билјана телефонски пријавила дека била физички нападната од лицето со кое била во љубовна врска. Полициски службеници од Гевгелија пристигнале во Богданци околу десет минути подоцна, разговарале со девојката и го повикале нејзиниот родител, бидејќи била малолетна. Таа била упатена на лекарски преглед, по насоки на јавен обвинител.

— реклама —

Во меѓувреме, полицијата го пронашла момчето и го привела во полициската станица во Гевгелија. По полноќ, Билјана со својот родител дошла во станицата, каде што била составена кривична пријава. По консултација со надлежниот јавен обвинител, момчето било пуштено по неколкучасовен разговор, а било одлучено по документирањето на случајот да следува кривична пријава во редовна постапка. За случајот бил известен и Центарот за социјална работа.

— реклама —

Потоа, по насоки на обвинителството, ОВР Гевгелија поднело кривична пријава за „Телесна повреда при вршење на семејно насилство“. На 16 октомври било подготвено решение за привремена мерка за заштита од семејно насилство, кое на 20 октомври било доставено до полицијата.

Следниот ден бил изготвен план за безбедност на Билјана и спроведување на мерката. Јанев рече дека полицијата ги контактирала девојката и нејзиниот татко, кои тогаш изјавиле дека сè е во ред, дека немаат контакт со момчето и дека тој не им се приближува.

— реклама —

Јанев не изнесе дополнителни детали за понатамошните активности на полицијата, повикувајќи се на чувствителноста на случајот и почитта кон семејствата. Тој изрази сочувство на блиските на загинатите и жалење за трагедијата што ги потресе Богданци и македонската јавност.