По трагедијата на натпреварот со Тенерифе, голманот на Андора размислува за крај на кариерата

Голманот на Андора, Хесус Овоно, наводно размислува да ја прекине професионалната фудбалска кариера по трагичниот инцидент на натпреварот против Тенерифе, на кој животот го загуби 30-годишниот напаѓач Хесус де Мигел. Шпанските медиуми пренесуваат дека 25-годишниот чувар на мрежата е длабоко потресен од случувањата.

— реклама —

Трагедијата се случила по дуел во кој Овоно со коленото го удрил Де Мигел во пределот на градите. Напаѓачот веднаш паднал на теренот, а медицинските екипи започнале со реанимација. И покрај нивните напори, фудбалерот подоцна починал од последиците од срцев удар.

По објавувањето на веста, Овоно се соочил со навреди од дел од навивачите, кои од трибините го нарекувале „убиец“. Негативни реакции имало и на социјалните мрежи, поради што, според медиумските извештаи, голманот ги деактивирал своите профили.

— реклама —

Шпанските медиуми пишуваат дека Овоно бил целосно скршен од настанот, долго останал сам во соблекувалната и со солзи се надевал дека ќе пристигнат добри вести за состојбата на противничкиот фудбалер.

— реклама —

Дополнителен притисок претставува истрагата за околностите на трагедијата. Дел од медиумите ја споменуваат и можноста за затворска казна доколку биде утврдена негова вина.

Најголемо внимание, сепак, предизвикаа наводите дека Овоно им соопштил на соиграчите оти размислува да стави крај на кариерата и дека засега не гледа можност да се врати на терените, без оглед на исходот од истрагата.

— реклама —

Овоно ова лето потпиша тригодишен договор со Андора. Претходно беше дел од младинските категории на Реал Сосиедад, а настапуваше и за Алавес и Сан Игнасио.