Јавната установа Национален парк „Маврово“ упати апел за одговорно и внимателно движење кон Корабскиот Водопад, нагласувајќи дека патеката и понатаму останува небезбедна за посета поради присуство на снег и зимски наноси, кои создаваат сериозен ризик од повреди и несреќи.
Од паркот препорачуваат сите посети и организирани тури кон оваа дестинација да бидат одложени најмалку до 15 јуни 2026 година, односно до целосно стабилизирање на условите на терен.
„Овој апел не претставува ограничување на љубовта кон планината, туку потсетник дека вистинската планинарска култура започнува со почитување на природата и нејзините правила. Неодамнешната спасувачка акција на оваа патека уште еднаш потврди дека планината не простува потценување и импровизација.
Планината не е простор што треба да се „освои“, туку место каде човекот треба да пристапи со зрелост, подготовка и свест за сопствената безбедност. Најголемиот успех на секоја тура не е фотографијата од врвот или водопадот, туку сигурното враќање дома.
Службите на Националниот парк „Маврово“ остануваат постојано присутни на терен и будно ја следат состојбата. Јавноста ќе биде навремено информирана кога патеката повторно ќе биде безбедна и подготвена за посетители.
Да бидеме одговорни — кон себе, кон другите и кон природата што ни е доверена“, се вели во соопштението.
За потсетување, вчера во Центарот за управување со кризи била примена пријава од А.М. дека на планината Кораб, во близина на Корабскиот Водопад, на подрачјето на општина Маврово-Ростуше, неговиот колега планинар А.С. (33) од Скопје доживеал несреќа, при што се здобил со скршеница на колкот и повреди на ногата.
Поради непристапниот терен на надморска височина од околу 1.900 метри, била формирана спасувачка екипа составена од претставници на Националниот парк „Маврово“, Итната медицинска помош и полициски службеници од Полициското одделение Маврово, која во 15:50 часот се упатила кон теренот од село Жужње.
По повеќечасовна акција, во 23:10 часот повредениот А.С. бил успешно спуштен во село Жужње, од каде е пренесен во болницата во Гостивар за понатамошно лекување.
МВР со детали за вчерашната спасувачка акција на Кораб: Извлечен и хоспитализиран повреден планинар
Вчера во Центарот за управување со кризи била примема пријава од А.М. дека на планината Кораб, во близина на Корабскиот водопад, општина Маврово-Ростуше, неговиот колега планинар А.С.(33) од Скопје доживеал несреќа, при што се здобил со скршеница на колкот и повреди на ногата. Поради непристапниот терен на надморска височина од околу 1.900 метри формирана е спасувачка екипа од претставници на Националниот парк „Маврово“, Итната медицинска помош и полициски службеници од Полициското одделение Маврово кој во 15:50 часот се упатила кон теренот од село Жужње.Во 23:10 часот, повредениот А.С. бил успешно спуштен во селото Жужње, од каде е пренесен во болницата во Гостивар за понатамошно лекување.
Македонија | пред 20 часа
