Фудбалската репрезентација на САД продолжува со одличните настапи на Светското првенство, откако со победата од 2-0 против Австралија го обезбеди првото место во групата Д по само две одиграни кола.
По натпреварот, селекторот Маурисио Почетино порача дека амбициите на неговиот тим се големи, но нагласи дека за евентуален поход кон титулата ќе бидат потребни сите најдобри играчи.
Во центарот на вниманието беше отсуството на најголемата ѕвезда на американската селекција, Кристијан Пулишиќ, кој не настапи поради здравствени проблеми.
„Секогаш е тешко кога не можете да сметате на толку важен играч. Кристијан ни значи многу, но ова е тимски спорт. Во овој момент беше невозможно да настапи. Се надеваме дека ќе биде подготвен за следниот натпревар. Ако сакаме да го освоиме Светското првенство, мора да го имаме на располагање целиот тим“, изјави Почетино.
Со триумфот над Австралија, Американците стигнаа до втора последователна победа во групната фаза, нешто што им успеало за првпат по Светското првенство во 1930 година.
Почетино не го криеше восхитот кон Пулишиќ, оценувајќи го како еден од најдобрите фудбалери во светот.
„Сите играчи се важни, но Кристијан е еден од најдобрите фудбалери на планетата. Се надевам дека брзо ќе се опорави и ќе ни помогне во продолжението од турнирот“, додаде аргентинскиот стратег.
Во последното коло од групната фаза, САД ќе се соочат со Турција, а за потврда на првото место ќе им биде доволен и бод. По две одиграни кола, Американците имаат шест бода, Австралија три, додека Турција и Парагвај се без освоен бод.
