Почина актерката од „Беверли Хилс, 90210“ Кимари Џонсон

Американската актерка Кимари Џонсон, позната по појавувањето во популарната серија „Беверли Хилс, 90210“, почина на 50-годишна возраст, нешто повеќе од една недела откако доживеала срцев застој во својот дом во Лос Анџелес, САД.

— реклама —

Веста за нејзината смрт ја потврдила нејзината внука Ронда Скот, која открила дека Џонсон на 27 октомври доживеала срцев застој, по што итно била пренесена во болницата „Седарс-Синај“. Лекарите ѝ дијагностицирале аневризма на срцето. Актерката починала мирно во средата попладне, откако срцето ѝ престанало да чука.

— реклама —

Џонсон во 1998 година се појавила во една епизода од осмата сезона на серијата „Беверли Хилс, 90210“, каде што ја толкувала Џуди. Имала улога и во комедијата „Друже, каде ми е колата?“ од 2000 година, во која настапиле Ештон Качер и Шон Вилијам Скот.

По раѓањето на синот Камерон Нино во 2003 година, таа привремено се повлекла од актерството, но подоцна се вратила на сцената и продолжила да настапува во независни филмови и театарски претстави.

— реклама —

Покрај актерството, Џонсон се занимавала и со филмска продукција. Била извршна продуцентка на филмот „The Last Eve“ од 2005 година, а во 2011 година ја основала козметичката марка „SkinGlow by Kimmarie“. Во последните месеци повторно се посветила и на манекенството, а во август се појавила на насловната страница на словенечкото издание на списанието „Grazia“.

— реклама —

Џонсон е уште една од актерите од популарната серија кои починаа во изминатите години. Лук Пери, кој го играше Дилан Мекеј, почина во март 2019 година на 53-годишна возраст, по тежок мозочен удар. Џо Е. Тата, познат како Нато Бусичи, сопственикот на ресторанот „Пич Пит“, почина во август 2022 година на 86 години. Во јули 2024 година почина и Шенен Доерти, која ја толкуваше Бренда Волш, на 53-годишна возраст, по долгогодишна борба со ракот.