Почина актерот Том Скерит, ѕвездата од „Осмиот патник“ и „Топ ган“

Американскиот актер Том Скерит, познат по улогите во филмовите „Осмиот патник“ и „Топ ган“, починал на 21 октомври на 93-годишна возраст. Веста за неговата смрт ја соопштило семејството, а според објавените информации, починал од природна смрт.

— реклама —

Скерит остварил повеќе од 170 улоги во филмови и телевизиски продукции во текот на кариерата што траела повеќе од шест децении. Дебитирал во 1962 година со филмот „Воен лов“, а пошироката публика го запознала преку „МАШ“ и научнофантастичниот филм „Осмиот патник“ од 1979 година, во кој го толкувал капетанот Далас.

— реклама —

Во филмот „Топ ган“ од 1986 година го играл командантот Мајк „Вајпер“ Меткалф, инструктор во елитното училиште за пилоти на американската морнарица. Во 1993 година освоил награда „Еми“ за улогата во телевизиската серија „Пикет Фенс“.

Меѓу позначајните остварувања во кои настапил се и филмовите „Челични магнолии“, „Река тече низ неа“ и „Контакт“.

— реклама —

Покрај актерството, Скерит бил посветен и на хуманитарната работа. Во 2012 година учествувал во основањето на организацијата „Ред Беџ Проект“, која им помага на воените ветерани полесно да се приспособат на цивилниот живот преку раскажување приказни и креативна работа.

Неговото семејство го опишало како човек исполнет со хумор, љубопитност, мудрост и великодушност. Зад себе ги оставил сопругата Џули Токашики, пет деца, пет внуци и два правнуци. Неговиот последен филм, „Скрши“, бил објавен во 2025 година.