Денеска во Скопје, на 71-годишна возраст, почина универзитетскиот професор и амбасадор Јован Донев, кој зад себе остави значајна академска, научна и дипломатска кариера.
Донев дипломирал на Правниот факултет при Универзитетот „Св. Кирил и Методиј“ во Скопје во 1979 година, магистрирал во 1986, а докторирал во 1993 година. Значаен дел од неговиот научен интерес бил насочен кон македонската историја, меѓународните односи, геополитичките процеси и меѓународните аспекти на македонското прашање.
Научната кариера ја градеше во Институтот за национална историја во Скопје, каде што беше научен советник и редовен професор. Предавал и на повеќе високообразовни институции, меѓу кои Универзитетот „Американ колеџ“ во Скопје и Правниот факултет „Јустинијан Први“.
Од 1999 до 2012 година беше извршен директор на Институтот за општествени и хуманистички истражувања „Евро-Балкан“, а претходно ја извршуваше и функцијата директор на Охридскиот летен универзитет.
Во текот на 1990-тите години беше и претседател на Управниот одбор на Фондацијата Институт Отворено Општество Македонија.
Во дипломатската кариера Донев беше амбасадор на Република Македонија во Обединетото Кралство, со седиште во Лондон, од 2013 до 2017 година. Во истиот период беше акредитиран и како амбасадор во Ирска и Исланд.
Во 2017 година беше член на Советот за безбедност на Република Македонија.
Донев е автор и коавтор на бројни научни трудови и публикации посветени на историјата, меѓународните односи и надворешната политика, со посебен интерес за Македонија во меѓународните договори, односите на големите сили кон Балканот и македонското прашање во периодот на Балканските војни.
Во последните години беше активен и како колумнист и политички аналитичар.
Со неговото заминување, македонската академска и дипломатска јавност загуби професор, научник и дипломат со долгогодишен професионален ангажман во историјата, меѓународните односи и надворешната политика.
