Македонската театарска сцена загуби уште еден значаен автор. Почина режисерот и драматург Кирил М. Петрески, долгогодишен член на прилепскиот Народен театар „Војдан Чернодрински“.
Веста за неговата смрт денеска ја соопшти Театарот „Војдан Чернодрински“, од каде што изразија сочувство до неговото семејство, блиските, колегите и соработниците.
Петрески, кој живееше од 1971 до 2026 година, од 2013 година работеше како драматург и режисер во НУЦК „Марко Цепенков“ – Театар „Војдан Чернодрински“ во Прилеп. Во повеќе од една деценија работа остави значаен авторски белег на прилепската сцена.
Дипломирал театарска режија на Факултетот за драмски уметности во Скопје, во класата на професорот Слободан Унковски. Негова дипломска претстава била „Фарса за храбриот Науме“ од Русомир Богдановски.
Како режисер, во Прилеп ги поставил „ММЕ кој прв почна“ од Дејан Дуковски, „Роберто Зуко“ од Бернар-Мари Колтес, „Четвртата сестра“ од Јануш Гловацки, „Малиот принц“ од Антоан де Сент-Егзипери, „Маратонците го трчаат почесниот круг“ од Душан Ковачевиќ, „Хамлет од Горно Дупени“, „Демократија“ и „Ученикот“.
Со „Роберто Зуко“ учествувал на Македонскиот театарски фестивал „Војдан Чернодрински“ во 2006 година, а „Четвртата сестра“ исто така била дел од фестивалската програма.
Неговото творештво не било поврзано само со Прилеп. Во Кумановскиот театар ги поставил „Варијации: диви пајки“ и „Не играј на Англичани“, додека во Народниот театар „Григор Прличев“ во Охрид ја режирал претставата „На дното“ според Максим Горки.
Од прилепскиот театар порачаа дека со заминувањето на Петрески македонскиот театар губи автор кој оставил препознатлив печат во својата работа.
