Почина Васко Јолески, претседателот на „Храбро срце“ и борец за правата на пациентите

Почина Васко Јолески од Струга, претседател на Националното здружение „Храбро срце“, кој повеќе од шест години живееше со механичка пумпа за поддршка на срцето, чекајќи трансплантација.

— реклама —

Јолески се соочуваше со тешка срцева слабост, дијагностицирана во 2011 година, а во 2020 година му беше поставена механичка циркулаторна потпора, од која зависеше неговото секојдневно функционирање.

— реклама —

Како претседател на „Храбро срце“, тој се залагаше за подобри услови за лекување на пациентите со механичка поддршка на срцето. Јавно укажуваше на високите трошоци за лекување, недостигот од системска поддршка и потребата од поголема свест за дарувањето органи.

— реклама —

Неодамна се појави можност за трансплантација на срце, на која Јолески со години се надеваше. Според претходно објавените информации, требаше да биде направен обид за оперативен зафат што можеше да претставува значаен чекор и за другите пациенти во слична состојба.

Јолески ќе остане запаметен по долгогодишната борба со тешката болест и посветеноста на застапувањето на правата на пациентите што чекаат трансплантација, како и на подигнувањето на свеста за значењето на дарувањето органи.