Почна да работи еден од компјутерските томографи на Радиологија, прегледите ќе се закажуваат во две смени

Еден од компјутерските томографи на Универзитетскиот институт за радиологија во Скопје од денеска повторно е во функција и е достапен за дијагностички прегледи, информираа од Министерството за здравство.

— реклама —

Од Институтот започнале организирано да ги повикуваат пациентите и да закажуваат нови термини за оние чии прегледи беа привремено презакажани поради дефектот. За да се реализираат прегледите во најкраток можен рок, работата е организирана во две смени, а ќе се работи и во текот на претстојниот викенд, во согласност со расположливите капацитети и медицинските приоритети.

— реклама —

Вториот компјутерски томограф, кој се наоѓа во хируршкиот комплекс и првенствено се користи за дијагностика на итни пациенти, сè уште е на сервис. Од Министерството очекуваат постапката да заврши во најскоро време.

— реклама —

Во меѓувреме, итните пациенти се згрижуваат во ГОБ „8 Септември“ и во Хируршката клиника „Свети Наум Охридски“ во Скопје, согласно меѓуинституционалната координација за обезбедување континуитет на неопходните дијагностички услуги.

Од Министерството за здравство апелираат да не се шират непроверени информации за состојбата, со цел да не се нарушува довербата во здравствениот систем.