Почна дистрибуцијата на 400.000 вакцини против сипаници кај овците и козите

Агенцијата за храна и ветеринарство почна со дистрибуција на 400.000 дози вакцини против сипаници кај овците и козите до ветеринарните друштва. Вакцините се од турско производство и се обезбедени како донација од Европската Унија, а нивното аплицирање на терен се очекува да почне од среда.

— реклама —

Од АХВ информираат дека лабораториските испитувања на Факултетот за ветеринарна медицина го потврдиле квалитетот, микробиолошката исправност и јачината на вакцините.

— реклама —

Со вакцинацијата ќе бидат опфатени 3.417 стада, односно 438.042 животни во осумте региони во Македонија. Во првата фаза ќе се вакцинираат 193.527 животни во 1.859 стада во Вардарскиот, Источниот, Југоисточниот и Североисточниот регион. Втората фаза ќе ги опфати Југозападниот, Пелагонискиот, Полошкиот и Скопскиот регион, со 244.515 животни во 1.558 стада.

Предвидена е и трета фаза за дополнителна вакцинација, со која ќе бидат опфатени животни што не биле вакцинирани во првите две фази, меѓу кои јагниња и јариња што ја достигнале потребната возраст, како и животни кај кои вакцинацијата била одложена од ветеринарни причини.

— реклама —

Од почетокот на годинава, АХВ евидентирала 115 жаришта на болеста. Во истиот период угинале 875 животни, а 9.359 биле нештетно отстранети.

— реклама —

„Со вакцинацијата ќе се опфатат 3.417 стада и 438.042 животни во осумте региони“, информираат од АХВ.