Американскиот режисер Чак Расел, познат по филмовите „Маска“ и „Ноќен кошмар во улицата Елм 3: Воини на соништата“, почина на 74-годишна возраст, објавија американските медиуми.
Според неговата сопруга Ања, Расел ненадејно починал во средата во својот дом во предградие на Сан Диего. Таа го пронашла без свест и веднаш повикала итна помош, но лекарските екипи не успеале да го реанимираат.
Расел важеше за режисер кој воведе иновативни визуелни ефекти во своите филмови и остави значаен белег во Холивуд.
Во текот на својата кариера ги режираше и филмовите „Бришачот“ (Eraser) од 1996 година со Арнолд Шварценегер во главната улога, „Благослови го ова дете“ (Bless the Child) со Ким Бесинџер и „Кралот на скорпиите“ (The Scorpion King) од 2002 година, во кој Двејн Џонсон ја имаше својата прва голема филмска улога.
По сценариото за хорор-трилерот „Dreamscape“ од 1984 година, Расел режисерски дебитираше со „Ноќен кошмар во улицата Елм 3: Воини на соништата“ во 1987 година. Филмот му даде нов подем на култниот серијал за Фреди Кругер и оствари голем успех во кината.
Заедно со својот долгогодишен соработник Френк Дарабонт го напиша сценариото и го режираше римејкот на хоророт „The Blob“, а светска слава стекна со филмот „Маска“ од 1994 година, во кој Џим Кери го толкува главниот лик. Остварувањето заработи повеќе од 350 милиони долари на светските кино-благајни и беше номинирано за Оскар за најдобри визуелни ефекти.
