Почина чичко Драги од Рекорд – човекот кој се грижеше за уличните кучиња

Почина чичко Драги, човекот кого речиси секој скопјанец го знаеше од неговата мала тезга кај Рекорд – Скопје. На 72-годишна возраст тој го загуби животот по подолго боледување.

Со години продаваше ситници – стегачи, шноли, штипки за коса, ланчиња. Околу него секогаш имаше кучиња – десетина улични миленици кои тој ги спасил и за кои секојдневно се грижеше.

Чичко Драги живееше сам, а неговиот дом беше засолниште за повеќе од десет кучиња од улица. Колку што имаше за себе, толку имаше и за нив.

Поради здравствени проблеми го имаше изгубено гласот, па со луѓето комуницираше пишувајќи на лист хартија. И покрај тоа, секогаш беше културен и добар со сите – човек со големо срце.

Пред три месеци беше покренат апел за помош за неговото лекување и за купување храна за кучињата. Минатиот месец на својот профил на Фејсбук им се заблагодари на граѓаните за донациите и напиша: „Ветувам дека од болница ќе излезам посилен“.

Надежта не го напушти до последно. Скопје денес се простува од човек кој, и покрај својот тежок живот, никогаш не престана да се грижи за оние што најмногу имаа потреба.

— реклама —