Градоначалникот на полскиот град Гдањск, Павел Адамович почина како последица на повредите здобиени во нападот за време на синоќешниот хуманитарен концерт, објави полското радио на својот твитер канал.
Докторите велат дека тој бил тешко ранет во пределот на срцето, дијафрагмата и внатрешните органи.
Адамович (53), кој на оваа функција е од 1998 година, беше во критична состојба по петчасовната операција.
Напаѓачот, кој полските медиуми го именуваат како 27 годишен Стефан В. од Гдањск има криминално досие и минатиот месец излегол од затвор.
Од Обвинителството велат дека досега е извршен распит на 20 сведоци, а набрзо ќе биде испитан и осомничениот. Според информациите тој го избодел градоначалникот со нож долг 14,5 сантиметри.
