Жителите на Општина Брвеница се простуваат од својот градоначалник Јовица Илиевски, кој почина, пренесуваат локалните медиуми. Според неофицијални информации, причина за смртта е срцев удар.
Илиевски беше долгогодишна и препознатлива политичка фигура во општината, а функцијата градоначалник ја извршуваше од ноември 2021 година, кога беше избран да раководи со локалната самоуправа во мандатот 2021–2025 година.
Својата професионална кариера ја градеше во здравствениот сектор, локалната политика и спортот. Од 1999 година до ноември 2021 година беше вработен во ЈЗУ Клиничка болница Тетово, а во периодот од 2013 до 2017 година беше член на Советот на Општина Брвеница.
Покрај политичкиот ангажман, Илиевски беше и голем љубител на спортот. Активно учествуваше во работата со младинските категории во рамките на Фудбалската федерација на Македонија од 2001 до 2013 година, а од 2013 до 2021 година беше дел од стручниот штаб на младата репрезентација до 21 година. Од средината на 2021 година беше ангажиран и во А-репрезентацијата, додека од 2016 година ја извршуваше и функцијата потпретседател на Фудбалскиот сојуз Тетово.
Јовица Илиевски беше оженет и татко на две полнолетни деца. Неговата смрт претставува голема загуба за Општина Брвеница, но и за спортската и општествената заедница во регионот.
