Со голема тага, Клиничката болница „Аџибадем Систина“ информираше за смртта на прим. д-р Драган Христов, специјалист по ортопедска хирургија и еден од лекарите кои ги поставија темелите на ортопедската хирургија во оваа здравствена установа.
Од болницата посочуваат дека д-р Христов бил дел од ортопедскиот тим уште од самото отворање на „Аџибадем Систина“ во 2010 година, каде со својата стручност, знаење и професионалност дал значаен придонес во развојот на оваа медицинска гранка.
„Со неговата стручност, знаење и професионалност ги создаде темелите и го започна развојот на ортопедската хирургија во нашата болница, давајќи несебична поддршка на тимот. Особено сме горди што имавме можност да соработуваме и да учиме од овој голем човек“, наведуваат од „Аџибадем Систина“.
Од менаџерскиот тим и вработените во болницата изразија длабока почит и искрено сочувство до семејството, пријателите и колегите на д-р Христов.
„Вечна му слава“, порачаа од „Аџибадем Систина“.
