Почина спортскиот новинар и коментатор Сами Адеми, еден од доајените на спортското новинарство во земјата, кој со децении ги пренесуваше фудбалските натпревари и беше препознатлив глас на репрезентативните средби.
Од Фудбалската репрезентација на Македонија соопштија дека Адеми заминал „тивко, како што знаат да заминат големите“, истакнувајќи дека тој не бил само коментатор и хроничар на спортските настани, туку и нивен активен дел.
Тој својата кариера ја градеше преку МТВ 2 и на стадионите ширум земјата, каде што со својот препознатлив глас ги пренесуваше радосните и тешките моменти на македонскиот спорт. Колегите и спортската јавност го опишуваат како човек кој живеел за фудбалот и репрезентацијата.
Од Фудбалската репрезентација порачаа дека неговото заминување претставува голема загуба и дека неговиот глас и присуство ќе недостасуваат во спортските преноси.
Сами Адеми ќе остане запаметен како еден од симболите на спортското новинарство во Македонија.
