Починал уште еден припадник на движењето на „Жолтите елеци“ во Франција откако го удрил камион за време на патни блокади во близина на градот Авињон.
Локалните власти соопштија дека возачот на камионот е уапсен и притворен откако се обидел да избега од местото на инцидентот. Во соопштението се наведува дека повредениот демонстрант со екипа на Брза помош веднаш бил пренесен во болница, но во текот на ноќта им подлегнал на повредите.
Уште пет демонстранти досега загинаа во сообраќајни несреќи, а повеќе од 1.400 припадници на „жолтите елеци“ се повредени во протестите против зголемувањето на цените на горивата откако почнаа демонстрациите минатиот месец. Демонстрантите блокираа важни сообраќајници низ цела Франција, а во Париз протестите прераснаа во немири. Учесниците во актуелните протести во Франција се нарекуваат „жолти елеци“ поради флуоресцентните безбедносни елеци што ги носат.
