Почнаа пожарите: Гори депонијата во Визбегово, а пожарникарите интервенираа на 13 локации

На територијата на државата до 20:00 часот денеска се регистрирани вкупно 13 пожари на отворен простор, од кои еден е сѐ уште активен, еден е ставен под контрола, а 11 се целосно изгаснати, информира Центарот за управување со кризи (ЦУК).

Активен останува пожарот во Општина Бутел, на депонијата во Визбегово.

Под контрола е ставен пожарот на градската депонија во Демир Хисар, каде што горело ѓубре.

Во текот на денот целосно се изгаснати пожарите кај Љуботенски пат во Општина Бутел, на патот кон Страхојадица во Општина Зелениково, кај селото Булачани во Општина Гази Баба, во Средно Коњаре во Општина Петровец, како и кај Бардовци во Општина Карпош.

Изгаснати се и пожарите во прилепското село Лениште, кај Кадмо плажа во Охрид, пред патарината во Општина Градско, во населбата Насеље во Штип каде што било запалено дрво, на Слупчански пат во Општина Липково каде што горело ѓубре, како и кај селото Псача во Општина Ранковце.

Најголем дел од пожарите биле на ниска вегетација, сува трева, трње и отпад, а надлежните апелираат на внимателност поради високите температури и зголемениот ризик од пожари на отворен простор.