Над 25.000 слободни места ги очекуваат идните средношколци, откако денеска официјално стартуваше првиот уписен рок за запишување во прва година средно образование за учебната 2026/2027 година.
Полуматурантите ќе можат да се пријават по електронски пат преку порталот Uslugi.gov.mk, користејќи ги своите кориснички сметки од schools.mk, по што ќе треба да ја достават потребната документација во средните училишта во кои конкурираат.
Според Конкурсот на Министерството за образование и наука, првото електронско пријавување во јунскиот уписен рок ќе трае од 00:00 часот на 12 јуни до 23:59 часот на 15 јуни. Второто пријавување е предвидено за 23 јуни, додека во августовскиот уписен рок ќе има едно електронско пријавување – на 20 август.
За претстојната учебна година се обезбедени над 25.000 слободни места во 109 јавни средни училишта низ државата. Од нив, повеќе од 17.000 места се во стручното образование, речиси 6.000 во гимназиското образование, а 570 места се предвидени во уметничките училишта.
Од Министерството за образование и наука апелираат учениците и нивните родители навремено да го завршат процесот на пријавување и доставување на документацијата, со цел уписите да се реализираат без застој и дополнителни компликации.
