Околу 40 коњаници денес попладне ќе тргнат од црквата „Свети Петар и Павле“ во Горно Лисиче кон Крушево, каде на 2 август ќе учествуваат во одбележувањето на големиот државен празник – Илинден.
Меѓу учесниците на 48. традиционален Илинденски коњички марш годинава има и пет девојки, кои ќе бидат дел од повеќедневното патување до Крушево.
На 31 јули коњаниците од Горно Лисиче ќе им се придружат на учесниците од Свети Николе, Кичево и Битола, испраќајќи порака за единство, почитување на традицијата и зачувување на македонското историско наследство.
Општина Аеродром ги повика граѓаните да присуствуваат на свеченото испраќање на учесниците и да им дадат поддршка пред почетокот на маршот.
Традиционалниот Илинденски коњички марш се организира секоја година во пресрет на Илинден, во организација на Здружението на граѓани „Илинденски марш 1978“ и претставува еден од најпрепознатливите настани посветени на одбележувањето на овој значаен датум од македонската историја.
