Со натпреварот меѓу Мексико и Јужна Африка, кој е закажан за вечерва во 21 часот, официјално започнува Светското првенство 2026 – најголемиот Мундијал во историјата на фудбалот.
Пред љубителите на најважната споредна работа на светот се 104 натпревари, 48 репрезентации и нов формат на натпреварување, кој ветува повеќе неизвесност и изненадувања од кога било досега.
За првпат во историјата на Светските првенства ќе настапат 48 селекции, наместо досегашните 32. Репрезентациите се поделени во 12 групи со по четири екипи, а во осминафиналето ќе се пласираат првите две селекции од секоја група, како и осумте најдобро третопласирани репрезентации.
Групната фаза ќе трае до 27 јуни, нокаут-фазата започнува на 28 јуни, а големото финале е закажано за 19 јули.
Актуелниот светски шампион Аргентина, предводена од 39-годишниот Лионел Меси, ќе се обиде да ја одбрани титулата, додека европскиот првак Шпанија важи за еден од главните фаворити за освојување на трофејот.
Ова Светско првенство би можело да остане запаметено и како последен мундијалски настап за неколку фудбалски великани. Покрај Меси, својот шести Мундијал ќе го одигра и 41-годишниот Кристијано Роналдо, додека Лука Модриќ и натаму е лидер на хрватската репрезентација.
Покрај Аргентина и Шпанија, меѓу главните кандидати за титулата се вбројуваат Франција, предводена од Килијан Мбапе, како и Бразил, Англија и Португалија.
Како можни изненадувања на турнирот, фудбалските аналитичари ги издвојуваат Холандија, Шкотска и Норвешка, селекции кои пристигнуваат во одлична форма и со големи амбиции.
Во меѓувреме, ФИФА најави и построги судиски критериуми. Арбитрите ќе обрнуваат посебно внимание на одолговлекувањето на играта, турканиците и конфликтите во шеснаесетникот, со цел да се зголеми ефективното време на игра и да се намалат неспортските ситуации.
Најголемиот Мундијал досега започнува вечерва, а следниот месец ветува фудбалски спектакл, нови херои и моменти што ќе останат запишани во историјата на спортот.
