Во Иран денеска почнува петдневниот рок за кандидатура за предвремени претседателски избори, кои се одржуваат по смртта на Ебрахим Раиси во хеликоптерска несреќа.
Кандидати за изборите закажани за 28 јуни можат да бидат лица на возраст од 40 до 75 години, а мора да имаат најмалку магистерски студии.
Сите потенцијални кандидатури мора да бидат одобрени од Советот на револуционерната гарда, 12-члено тело составено од адвокати и истакнати верски водачи надгледувани од иранскиот врховен водач Али Хамнеи.
Советот никогаш не прифатил жена за кандидат или некој кој повикува на радикални промени во владеењето на државата, потсетуваат политичките аналитичари.
Фаворит би можел да биде вршителот на должноста претседател на земјата, Мохамед Мокбер.
Како можни кандидати се разговара и за поранешниот тврдокорен претседател Мохамад Ахмадинеџад и поранешниот реформски претседател Мохамед Катами, но прашање е дали ќе им биде дозволено да се кандидираат.
Петдневниот рок за пријавување завршува во вторник.
Раиси е вториот ирански претседател кој починал на функцијата. Во 1981 година, тогашниот претседател Мохамед Али Раџаи беше убиен во експлозија на бомба во хаотичните денови по Исламската револуција.
